رابطہ عالم اسلامی نے مکہ مکرمہ اور مدینہ منورہ کے علاقوں پر حوثی گروہ کی جانب سے کیے گئے حملوں اور سعودی عرب کے خلاف اس کی مسلسل مجرمانہ جارحیت، نیز مسلمانوں، ان کے مقدسات اور مساجد کو خوف وہراس کا نشانہ بنانے کی شدید الفاظ میں مذمت کی ہے
رابطہ عالم اسلامی کی جانب سے جاری بیان
مکہ مکرمہ: رابطہ عالم اسلامی نے مکہ مکرمہ اور مدینہ منورہ کے علاقوں پر حوثی گروہ کی جانب سے کیے گئے حملوں اور سعودی عرب کے خلاف اس کی مسلسل مجرمانہ جارحیت، نیز مسلمانوں، ان کے مقدسات اور مساجد کو خوف وہراس کا نشانہ بنانے اور مقدسات کی حرمت پامال کرکے انہیں اشتعال دلانے کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے حوثی گروہ کے دہشت گردانہ طرزِ عمل اور مقدسات ومساجد کو نشانہ بنانے والے اس کے حملوں کی مذمت کی، جن میں مدارس اور شہری تنصیبات بھی شامل ہیں۔ انہوں نے کہا کہ یہ اقدامات ہمارے دینِ حنیف کی اقدار اور انسانی اصولوں کی بنیادی ترین قدروں کی کھلی خلاف ورزی ہیں۔ انہوں نے اسلامی ممالک اور عالمی برادری سے مطالبہ کیا کہ وہ مکہ مکرمہ اور مدینہ منورہ کے علاقوں پر ان لوگوں کی جانب سے کیے گئے حملوں کی مذمت کریں جو خود کو ’’انصار اللہ‘‘ کہتے ہیں۔ ان کے یہ اقدامات ایسے دہشت گردانہ طرزِ عمل کی عکاسی کرتے ہیں جو اللہ تعالیٰ کی مقرر کردہ حرمتوں کی خلاف ورزی کرتے ہوئے مسلمانوں کی جانوں اور ان کے مقدسات کو ہلاکت کے خطرے سے دوچار کرتا ہے۔ اس میں اللہ اور اس کے رسول ﷺ کی نصرت تو درکنار، بلکہ دین اور مسلمانوں سے خیانت اور اللہ اور اس کے رسول ﷺ کی ہدایت سے روگردانی ہے۔
ڈاکٹر العیسی نے رابطہ کے تمام عالمی اداروں، اکیڈمیوں اور کونسلوں، نیز اس کے زیرِ سایہ تمام اسلامی اقوام کی جانب سے مملکتِ سعودی عرب کے ساتھ مکمل یکجہتی کا اعادہ کرتے ہوئے اس امر پر زور دیا کہ رابطہ دہشت گرد حملہ آوروں کو روکنے، مقدسات کی حرمت اور مسلمانوں کی جانوں کے تحفظ کے لیے کیے جانے والے تمام اقدامات کی بھرپور تائید کرتی ہے۔ انہوں نے اللہ تعالیٰ سے دعا کی کہ وہ مملکت کو ان مجرم حملہ آوروں کے خلاف نصرت عطا فرمائے جنہوں نے اللہ تعالیٰ کی مقرر کردہ حرمتوں اور مسلمانوں کے مقدسات کو پامال کیا، اور مملکتِ سعودی عرب، تمام اسلامی ممالک اور ان کے مقدسات، سرزمین، قیادت اور عوام کو ہر قسم کے شر و آفت سے محفوظ رکھے۔
