رابطہ عالم اسلامی کے سیکرٹری جنرل کا نیوزی لینڈ کی مسجد النور کا دورہ، مسجد کی ازسرِ نو تعمیر کا اعلان
کرائسٹ چرچ (نیوزی لینڈ):
رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبدالکریم العیسی نے نیوزی لینڈ کے شہر کرائسٹ چرچ میں واقع مسجد النور کا دورہ کیا، جہاں 15 مارچ 2019ء (8 رجب 1440ھ) کو نمازِ جمعہ کے دوران دہشت گرد حملہ ہوا تھا، جس میں درجنوں نمازی شہید اور زخمی ہوئے تھے۔
دورے کے دوران عزت مآب شیخ ڈاکٹر محمد العیسی نے مسجد کی موجودہ ضروریات کا دوبارہ جائزہ لیا، حملے میں محفوظ رہنے والے افراد اور شہداء کے اہلِ خانہ سے ملاقات کی، اور ان سے اظہارِ تعزیت و یکجہتی کیا۔ انہوں نے اس موقع پر اس عزم کا اعادہ کیا کہ رابطہ عالم اسلامی دنیا بھر کی مسلم برادریوں سے اپنے تعلق کو مزید مضبوط بنائے رکھے گا، اور نفرت، انتہاپسندی اور تشدد پر مبنی نظریات کے انسداد، نیز رواداری، بقائے باہمی اور سماجی ہم آہنگی کے فروغ کے لیے اپنی عالمی کاوشیں اور عملی پروگرام جاری رکھے گا۔
مسجد کی انتظامیہ نے عزت مآب شیخ ڈاکٹر محمد العیسی کو آگاہ کیا کہ گزشتہ چند برسوں میں نمازیوں کی تعداد میں نمایاں اضافے کے باعث موجودہ عمارت اب ضروریات پوری نہیں کر پا رہی، اس لیے مسجد کی ازسرِ نو تعمیر، توسیع اور ایک مستقل لیکچر و مکالمہ ہال کی تعمیر کی ضرورت ہے۔ اس پر ڈاکٹر العیسی نے رابطہ عالم اسلامی کے جنرل سیکرٹریٹ کی جانب سے تمام قانونی تقاضے مکمل ہونے کے فوراً بعد مسجد النور کی ازسرِ نو تعمیر اور مطلوبہ توسیعی منصوبے کی کفالت کا اعلان کرتے ہوئے یقین دہانی کرائی کہ اس منصوبے پر ترجیحی بنیادوں پر عمل درآمد کیا جائے گا۔
