رابطہ عالم اسلامی کی مدینہ منورہ پر حوثی دہشت گرد ملیشیا کی جارحیت کی شدید مذمت
رابطہ عالم اسلامی کی مدینہ منورہ پر حوثی دہشت گرد ملیشیا کی جارحیت کی شدید مذمت
مکہ مکرمہ: رابطہ عالم اسلامی نے ہمارے آقا و نبی کریم ﷺ کے شہر مدینہ منورہ میں بجلی کی تقسیم کے ’’طیبہ‘‘ اسٹیشن پر حوثی دہشت گرد ملیشیا کے حملے کی شدید الفاظ میں مذمت کی ہے۔ یہ اسٹیشن مسجد نبوی شریف کو بجلی کی خدمات فراہم کرتا ہے۔ یہ حملہ مملکتِ سعودی عرب کے خلاف حوثی ملیشیا کی مسلسل مجرمانہ جارحیت کا تسلسل ہے، جس کی دہشت گردانہ کارروائیاں اب حرمین شریفین تک جا پہنچی ہیں، جو دو ارب سے زائد مسلمانوں کے جذبات کو بھڑکانے کی خطرناک کوشش ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے حوثی گروہ کی دہشت گردانہ روش اور مقدسات کی حرمت اور متعدد شہری تنصیبات کو نشانہ بنانے والے حملوں کی شدید مذمت کرتے ہوئے کہا کہ خود کو ’’انصار اللہ‘‘ کہنے والے اس گروہ کی یہ کارروائیاں ہمارے دینِ حنیف کی اقدار اور بنیادی انسانی اصولوں کی صریح خلاف ورزی ہیں، اور ایسی دہشت گردانہ روش کی عکاسی کرتی ہیں جو دینی مقدسات کی حرمت اور ایمانی وانسانی جذبات کو پامال کرتی ہے۔ انہوں نے کہا کہ ان پے در پے دہشت گرد جرائم کے باوجود اس گمراہ گروہ کا انہیں اللہ اور اس کے رسول ﷺ کی نصرت قرار دینا سراسر بے بنیاد ہے؛ بلکہ یہ دین اور مسلمانوں سے خیانت اور اللہ اور اس کے رسول ﷺ کی ہدایت سے انحراف ہے۔
ڈاکٹر العیسی نے رابطہ کے تمام عالمی اداروں، اکیڈمیوں اور کونسلوں، نیز اس کے زیرِ سایہ تمام اسلامی اقوام کی جانب سے مملکتِ سعودی عرب کے ساتھ مکمل یکجہتی کا اعادہ کرتے ہوئے اس امر پر زور دیا کہ رابطہ دہشت گرد حملہ آوروں کو روکنے، مقدسات کی حرمت اور مسلمانوں کی جانوں کے تحفظ کے لیے کیے جانے والے تمام اقدامات کی بھرپور تائید کرتی ہے۔ انہوں نے اللہ تعالیٰ سے دعا کی کہ وہ مملکت کو ان مجرم حملہ آوروں کے خلاف نصرت عطا فرمائے جنہوں نے دین کی حرمتوں اور مسلمانوں کے مقدسات کو پامال کیا، اور مملکت کی سرزمین، قیادت اور عوام کو ہر قسم کے شر و آفت سے محفوظ رکھے۔
