رابطہ عالم اسلامی کی جانب سے صوبہ بلوچستان،پاکستان میں ٹرین پر دہشت گرد حملے کی شدید مذمت
مکہ مکرمہ:
رابطہ عالم اسلامی نے جمہوریہ پاکستان کے صوبہ بلوچستان میں ایک ٹرین پر ہونے والے دہشت گرد حملے کی سخت ترین الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے ایک بار پھر اس امر کا اعادہ کیا کہ رابطہ عالم اسلامی ہر قسم کے تشدد اور دہشت گردی کو اس کی تمام شکلوں اور جوازوں سمیت قطعی طور پر مسترد اور قابلِ مذمت سمجھتی ہے۔انہوں نے اس المناک سانحے پر جمہوریہ پاکستان کے ساتھ مکمل یکجہتی کا اظہار کرتے ہوئے کہا کہ رابطہ پاکستان کی اُن تمام کوششوں کی حمایت کرتی ہے جو اس کے امن، استحکام اور عوام کی سلامتی کے تحفظ کے لیے کی جا رہی ہیں۔
ڈاکٹر العیسی نے جاں بحق افراد کے اہلِ خانہ اور پوری پاکستانی قوم سے دلی تعزیت اور ہمدردی کا اظہار کرتے ہوئے دعا کی کہ اللہ تعالیٰ مرحومین کو اپنی وسیع رحمت میں جگہ عطا فرمائے، انہیں جنت الفردوس میں اعلیٰ مقام نصیب کرے، اور زخمیوں کو جلد صحت یاب فرمائے۔
