رابطہ عالم اسلامی کی جانب سے کویت اور بحرین پر ایرانی جارحیت اور آبنائے ہرمز میں جہاز رانی میں مداخلت کی شدید مذمت
مکہ مکرمہ:
رابطہ عالم اسلامی نے کویت اور بحرین کو نشانہ بنانے والی مجرمانہ ایرانی جارحیت، اور آبنائے ہرمز میں امن وامان کو سبوتاژ کرنے اور آزادانہ جہاز رانی کی راہ میں رکاوٹیں کھڑے کرنے کے مسلسل عمل کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے ان مسلسل مجرمانہ ایرانی حملوں کی مذمت کا اعادہ کیا، جو مذہبی اقدار سمیت بین الاقوامی و انسانی قوانین اور روایات کی صریح خلاف ورزی ہیں، اور خطے میں امن واستحکام کی بحالی کی کوششوں کو سبوتاژ کرنے کے مترادف ہیں۔
آپ نے کویت اور بحرین کے ساتھ مکمل یکجہتی کا اظہار کرتے ہوئے اس امر پر زور دیا کہ رابطہ ان دونوں ممالک کی جانب سے اپنے امن، خود مختاری، اور اپنے شہریوں ومقیم افراد کی سلامتی کے تحفظ کے لیے اٹھائے جانے والے تمام اقدامات کی بھرپور حمایت کرتی ہے۔
