 شاہ سلمان عالمی اکیڈمی برائے عربی زبان اور رابطہ عالم اسلامی کے مابین مفاہمت کی یادداشت پر دستخط
ریاض:
شاہ سلمان عالمی اکیڈمی برائے عربی زبان نے آج ریاض میں رابطہ عالم اسلامی کے ساتھ مفاہمت کی ایک یادداشت پر دستخط کیے ہیں۔ یہ اقدام اکیڈمی کی جانب سے بین الاقوامی شراکت داریوں کو وسعت دینے اور عربی زبان کی خدمت میں ادارہ جاتی ہم آہنگی کو فروغ دینے کے عزم کا عکاس ہے، تاکہ علاقائی اور عالمی سطح پر علمی،تعلیمی اور تکنیکی میدانوں میں عربی زبان کی موجودگی کو مزید مستحکم کیا جاسکے۔
یادداشت پر دستخط کی تقریب میں اکیڈمی کی نمائندگی نائب سیکرٹری جنرل ڈاکٹر ابراہیم بن محمد ابانمی نے کی، جبکہ رابطہ عالم اسلامی کی جانب سے معاون سیکرٹری جنرل برائےادارہ جاتی رابطہ، جناب عبدالوہاب بن محمد الشہری نے شرکت کی۔
اس موقع پر سیکرٹری جنرل رابطہ عالم اسلامی اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسیٰ نے اکیڈمی کے ساتھ اس شراکت داری پر رابطہ کی جانب سے فخر کا اظہار کیا۔ انہوں نے دنیا بھر میں عربی زبان کی خدمت کے حوالےسے اکیڈمی کی نمایاں کاوشوں اور کلیدی کردار کو سراہا، جو مؤثر پروگراموں اور ٹھوس نتائج کے حامل اقدامات کے ذریعے انجام دی جا رہی ہیں۔ ان کوششوں نے عربی زبان کی اصل شناخت کو راسخ کرنے اور مختلف سطحوں پر اس کی بین الاقوامی موجودگی کو مستحکم کرنے میں اہم کردار ادا کیا ہے۔
دوسری جانب، اکیڈمی کے سیکرٹری جنرل ڈاکٹر عبداللہ بن صالح الوشمی نے واضح کیا کہ اکیڈمی کی لسانی خدمات،جن میں بین الاقوامی اداروں کے ساتھ اسٹریٹجک شراکت داریوں کا قیام اور عربی زبان کی خدمت میں مشترکہ کاوشوں کا فروغ شامل ہے،وزیرِ ثقافت اور اکیڈمی کے بورڈ آف ٹرسٹیز کے چیئرمین، شہزادہ بدر بن عبداللہ بن فرحان کی مسلسل سرپرستی اور رہنمائی میں انجام پا رہی ہیں، اور یہ تمام کوششیں سعودی وژن 2030 کے اہداف سے مکمل ہم آہنگ ہیں۔ انہوں نے مزید کہا کہ رابطہ عالم اسلامی کے ساتھ یہ تعاون مشترکہ منصوبوں کے دائرہ کار کو وسعت دینے اور ایسے مؤثر لسانی اقدامات کی تیاری کا ایک اہم موقع فراہم کرے گا، جو عربی زبان کی تعلیم اور علمی وتکنیکی میدانوں میں اس کے استعمال کو مزید موثر بنانے میں مددگار ثابت ہوں گے۔
اس مفاہمتی یادداشت کا بنیادی مقصد عربی زبان کی خدمت کے مختلف شعبوں میں دونوں اداروں کے مابین باہمی تعاون کو فروغ دینا اور تعلیمی وتحقیقی ماحول میں عربی کی موجودگی کو مضبوط بنانا ہے۔ اس مقصد کے حصول کے لیے ایک منظم فریم ورک تشکیل دیا جائے گا، جو تجربات کے تبادلے، معیاری پروگراموں اور خصوصی منصوبوں کی تشکیل، اور مختلف تخصصی میدانوں میں عربی زبان کے استعمال کو مؤثر بنانے میں معاون ثابت ہوگا، تاکہ متعلقہ اداروں میں لسانی خدمات کے معیار کو مزید بہتر بنایا جا سکے۔
اس تعاون میں متعدد اہم شعبے شامل ہیں، جن میں نمایاں طور پر: عربی زبان کی کمپیوٹرائزیشن، ڈیجیٹل لغات اور لسانی ڈیٹا بیس کی تیاری، غیر عربی دان افراد کے لیے عربی زبان کی تعلیم، لسانی مہارت کے امتحانات اور لسانی خدمات ومشاورت کا تبادلہ شامل ہے۔ ان اقدامات کا مقصد تعلیمی، تکنیکی اور تحقیقی میدانوں میں مربوط لسانی خدمات کو فروغ دینا اور مشترکہ پروگراموں کے ذریعے دونوں اداروں کے اہداف کی تکمیل ہے۔
یہ مفاہمتی یادداشت اپنی بین الاقوامی موجودگی کو مضبوط بنانے اور مؤثر ادارہ جاتی شراکت داریوں کو فعال کرنے کی اکیڈمی کی ان کوششوں کا تسلسل ہے، جن کا مقصد لسانی مواد کو ترقی دینا اور مختلف شعبوں میں عربی زبان کے مقام کو مزید مستحکم کرنا ہے۔
اسی تناظر میں، عزت مآب شیخ ڈاکٹر محمد بن عبد الکریم العیسی نے اکیڈمی کے سیکرٹری جنرل ڈاکٹر عبد اللہ بن صالح الوشمی سے ملاقات کی اور باہمی دلچسپی کے متعدد امور پر تبادلہ خیال کیا۔
گزشتہاگلا
جمعرات, 7 May 2026 - 23:35 -
[](https://www.addtoany.com/share#url=https%3A%2F%2Fthemwl.org%2Fur%2Fnode%2F41474&title=%D8%B4%D8%A7%DB%81%20%D8%B3%D9%84%D9%85%D8%A7%D9%86%20%D8%B9%D8%A7%D9%84%D9%85%DB%8C%20%D8%A7%DA%A9%DB%8C%DA%88%D9%85%DB%8C%20%D8%A8%D8%B1%D8%A7%D8%A6%DB%92%20%D8%B9%D8%B1%D8%A8%DB%8C%20%D8%B2%D8%A8%D8%A7%D9%86%20%D8%A7%D9%88%D8%B1%20%D8%B1%D8%A7%D8%A8%D8%B7%DB%81%20%D8%B9%D8%A7%D9%84%D9%85%20%D8%A7%D8%B3%D9%84%D8%A7%D9%85%DB%8C%20%DA%A9%DB%92%20%D9%85%D8%A7%D8%A8%DB%8C%D9%86%20%D9%85%D9%81%D8%A7%DB%81%D9%85%D8%AA%20%DA%A9%DB%8C%20%DB%8C%D8%A7%D8%AF%D8%AF%D8%A7%D8%B4%D8%AA%20%D9%BE%D8%B1%20%D8%AF%D8%B3%D8%AA%D8%AE%D8%B7)